A CANZONA DI L'ACQUA (1988)

Ochju nascente à staccia rena

imperli a terra è caghji u celu

apri la to piova à falera 

in a filetta ch’incatena 

a to trafruca cum’è pelu

è face nasce a cantilena… 

U TO SGUARDU

U to sguardu surrisu chi d'amore lucia

Cù tanta l'armunia annant'à lu to visu

Hè scrittu, cumu sia, in eternu indivisu

DIMMI S'ELLU HÈ LU VERANU

Dimmi s'ellu hè lu veranu

s'ellu hè prontu lu to core

s'ellu vene dinù ellu

à coglie l'ore

dimmi s'elli si ne vanu

i penseri à l'albore

o si stanu à lu purtellu

à vulà fora

ISULA (1981)

Isula... 

Per mè sì lu viaghju 

sì quellu ch'io feraghju 

quellu chì mi chjama 

cù l'antica brama 

NATALE D'AMORE (1993)

BON NATALE

PACE È SALUTE PÈ U 2014

Gerda-Marie Kühn

&

Marilena Verheus

Natale d'amore

veni è canta fraternu

Natale d'amore

Cum'è un cantu in eternu

RIVECU (1988)

Rivecu l'ore chjare

Chì u sole ristagna

D'argentu luccichiu

À la nostra muntagna

CANZONA DI L'ATTEMPATI

(La chanson des vieux amants)

Ci hè piossu ind'è lu nostru amore

Vint'anni un tettu ùn tene mai

Centu volte ai lasciatu corre

Eo listessu è tù la sai

Ogni mobulu s'arricorda

In 'ssa stanza senza lettinu

Di e nostre vechje timpeste

S'era stallata la discorda

Un avie più gustu à dà

Nè eo voglia di cunquiste

SCANDULA (2006)

Tù sì chì sì locu incantatu

Nantu la terra è nantu mare

Di a natura bellu altare

Da qualchì fata pitturatu

25.000... À RINGRAZIAVVI !!!

Mumentu cummuvente: più di 25.000 pagine viste. Vulemu ringrazià à tutti quelli chì ogni tantu si facenu un'affaccata quì per passà cun noi una stunduccia di puisia! A sapemu, ùn hè nunda in paragonu cun certi altri blogghi, ma per noi ghjè un affarone! Da festighjalla avemu accunciatu appena a messa in pagina è aghjuntu qualchì "gadget": un lettore videò d'u canale YouTube di Una sì tù (ci truvarete dinù altre videò di 'GerdaLena'...), u novu discu d'Antone Ciosi nant'à Deezer, avemu spiazzatu a videò 'Una sì tù' è allargatu appena a pagina è a margine dritta - cambiamenti minò, ma migliuramenti impurtanti!

Ùn simu ancu à ghjunghje à a fine di l'opera puetica è musicale di l'amicu Ghjacumu, n'avemu per almenu altri trè anni è millaie di pagine viste. Sperendu di ritruvavvi prestu cun novi articuli vulemu quì abbraccià à tutti, ma innanzituttu à Ghjacumu Fusina per u so aiutu preziosu, a so ispirazione è u so talentu!

Basgi à tutti,

Gerda-Marie Kühn è Marilena Verheus

BASTIA RICORDI (1977)

Tanti ringrazii à Pasquale Renucci © pè ste  fottò magnifiche!

Lochi ci n'hè tanti, paesi è cantoni

Luntanu o vicinu

Ma quandi u ricordu vene trimuloni

In core citatinu

Collanu le fiure di case è balconi

È di mare latinu

È di mare latinu.