25.000... À RINGRAZIAVVI !!!

Mumentu cummuvente: più di 25.000 pagine viste. Vulemu ringrazià à tutti quelli chì ogni tantu si facenu un'affaccata quì per passà cun noi una stunduccia di puisia! A sapemu, ùn hè nunda in paragonu cun certi altri blogghi, ma per noi ghjè un affarone! Da festighjalla avemu accunciatu appena a messa in pagina è aghjuntu qualchì "gadget": un lettore videò d'u canale YouTube di Una sì tù (ci truvarete dinù altre videò di 'GerdaLena'...), u novu discu d'Antone Ciosi nant'à Deezer, avemu spiazzatu a videò 'Una sì tù' è allargatu appena a pagina è a margine dritta - cambiamenti minò, ma migliuramenti impurtanti!

Ùn simu ancu à ghjunghje à a fine di l'opera puetica è musicale di l'amicu Ghjacumu, n'avemu per almenu altri trè anni è millaie di pagine viste. Sperendu di ritruvavvi prestu cun novi articuli vulemu quì abbraccià à tutti, ma innanzituttu à Ghjacumu Fusina per u so aiutu preziosu, a so ispirazione è u so talentu!

Basgi à tutti,

Gerda-Marie Kühn è Marilena Verheus

BASTIA RICORDI (1977)

Tanti ringrazii à Pasquale Renucci © pè ste  fottò magnifiche!

Lochi ci n'hè tanti, paesi è cantoni

Luntanu o vicinu

Ma quandi u ricordu vene trimuloni

In core citatinu

Collanu le fiure di case è balconi

È di mare latinu

È di mare latinu.

PARLÀ

O giuvanottu ribellu

o giuvanotta à la moda

ùn ti scurdà di u corsu

adopralu in casa è fora

VIAGHJI (1987)

Tanti ringrazii à Daniel DELORME pè a fiura!

Da scopre venti simu nati
cum’è l’acelle benedetti
chì si lascianu nidu è tetti
quand’ella vene l’inguernata

E MANE IN PASTA (1980)

 

Chì fà sì u paese more

Chì fà sì a ghjente parte?

È sì la voce di u core

Ùn hà più amore à sparte?

Chì fà sì d'ogni casone
Si ne fala muru è tettu

È sì in tuttu lu reghjone

Corre lu focu maladettu

U SULLATU DI U FOCU (1986)

Sta volta ci hè una piccula surpresa in fondu à a pagina.

U sullatu di u focu 

hè un zitellone vivu

chì li piace d'esse attivu 

è difende u so locu

Per ellu hè cum'è un ghjocu 

d'esse prontu à la stagione

cù tuttu lu battaglione 

di sullati di u focu

AMARENI (1980)

À mezu à tutti li fiori d'amore

Quand'elli s'aprenu fattu l'albore

Era quellu innacquatu d'un licore

mandatumi una mane per favore

Mi fece sbuccià in capu e centu vite

è dede un altru sensu à le mio lite

fù per mè cum'è un anellu à le dite

è lu balsamu di le mio ferite

PAISAGHJI (1976)

Mi frisgianu a memoria
Issi capelli ricamati
Ochji calighjine è storia 
Pè isse strade è lochi amati

TRÀ MORE È CAMPÀ (1990)

In mente oghje mi vene 

Un surrisu di tè 

Da nantu à quella scena 

Di Piazza Tien An Mè

ERA UN PAISOLU (1990)

Era un paisolu, micca una cità

à u celu appesu paria in l'azurru quassù

cù le teghe grisge case à pitturà

è muri d'amore à cullà